نشطاء التواصل الاجتماعي يهاجمون الكاتبة نوارة نجم بعد خلعها الحجاب
الكاتبة نوارة نجم

تعرضت الكاتبة الصحفية نوارة نجم ابنة الشاعر الراحل أحمد فؤاد نجم، لموجة لاذعة من الانتقاد والسخرية وصلت لحد اتهامات بالعمالة للخارج بسبب نشرها صور لها دون أن ترتدي الحجاب.

وتوالت التدوينات على موقع التواصل الاجتماعي “تويتر” التي تحمل السباب والشتائم ضد الكاتبة نوارة نجم التي أكدت أن القرار قرارها ولا يخص أحد على الإطلاق، وأنها اتخذت قرار خلع الحجاب قبل عام وليس الآن.

وقالت نوارة “ما كنتش حارد بس حاضطر ارد دفاعا عن المحجبات مش عن شخصي.. انا قالعة الحجاب من اكتر من سنة وكنت متوقعة حفلة لما الموضوع يتعرف بس الحقيقة توقعت يتقال كافرة او متآمرة ع الاسلام ما توقعتش ابدا ان يتقال فلوس التمويل نضفتها وقلعت الحجاب! هو الحجاب وساخة؟ يتبع”.

وأضافت الكاتبة “عمري ما حد علق على واحد كان بدقن وحلقها أو العكس أو كان بجلابية وغيرها أو حتى كان متدين وألحد.. عمري ما حد علق على شكل راجل أو جسمه.. حق انتهاك الستات واقتحامهم ده إنتوا جايبينه من أنهي داهية والستات اللي بتظيط معاكم دول وضعهم إيه؟”.

وتابعت: “مش حاطلع حد على وضعي المادي لإن ده ما يخصش حد زمان كنت باعمل كده وقدمت بلاغ في نفسي لفحص مصادري المالية المعلنة والسرية ووكيل النيابة ضحك.. بس بطلت أدي حد مساحة مش حقه.. كويس إنكم فاكريني غنية.. بس مش كويس إنكم شايفين الحجاب بتاع الفقرا بس ومش كويس أصلا إنكم محتقرين الفقراء”.

واستطردت “وانتوا طبعًا ما بتفهموش عبارة أنا حرة، عشان إنتم نفسكم مش أحرار.. من جواكم إنتم مش أحرار.. وأنا مش مهتمة أفهمكم.. مهتمة أعرفكم بس قد إيه إنتم مثيرين للشفقة، على أي حال الستات المحجبات تحديدا اللي قالوا فلوس التمويل نضفتها لو إنتوا عايزين تقلعوا الحجاب وخايفين من المصروف أؤكد لكم إن الحجاب مكلف أكتر.. وفي كل الأحوال إذا مش عايزة تحترمي أي حد مختلف معاك على الأقل ما تحتقريش نفسك”.