كشفت التحقيقات في واقعة اختطاف نجل وزير أسبق، تفاصيل جديدة بشأن الواقعة، حيث تم اختطافه بالتحايل والإكراه، وتبين وجود علاقة بين المجني عليه والمتهم الأول، عرف من خلالها المتهم أن الضحية ميسور الحال، فشكل مع المتهمين تشكيلا عصابيا مكونا من 10 أشخاص لاختطافه.

وحصل القاهرة 24 على نص تحقيقات، حيث اعترف المتهم أمام جهات التحقيق قائلا: بعد ما طلعنا  من الفيلا أنا كنت متفق مع الناس اللي كانت معايا ويعملوا أنهم بيخطفونا عشان ميشكش في حاجة وفعلا لما ركنت العربية لقيتهم جم بالعربية الكيا ونزل منها علي ومحمد عنتر.

وواصل: وعلي نزل علشان يسوق ومحمد عنتر ركب جنبنا ورا وتحركنا على بيت عبد الله اللي في بشتيل علشان كان فيه كمين ومش هنعرف نسافر بيه طنطا.

واستكمل المتهم بخطف نجل وزير أسبق: نزلوني في الطريق وطلعوة علي بيت عبد الله وأنا نزلت ركبت مع مي  وحماده سواق العربية الكيا ورحت المستشفى علشان أغير علي الجرح وسحبنا الفلوس من الفيزا بتاعت ابن الوزير الأسبق وغيرت علي الجرح ولقيت عبدالله بيقولي ان مراته هتيجي ولازم يمشوا وكان النهار طلع والكمين مشي وأنا رجعتلهم ومي وحماده السواق وأديتهم العربية الكيا وركبت أنا ومراتي مع عم سعيد بتاع التاكسي.

وأضاف: كنا ماشين معاهم في الطريق لحد ما وصلنا لبيت أم مي مراتي اللي في طنطا وساعتها نزلنا كلنا وهما اخدوه علي الدور الأول وأنا طلعت علي حماتي في الدور الثالث.

وتابع المتهم بخطف نجل وزير أسبق: وبعدها نمت شويه وصحيت وقولنا هننزل نشتري الموبيلات أنا ومي ونزلت أنا ومي واشترينا الخمس موبيلات اللي موجودين ادامنا دلوقتي وانا كنت هاخد أيفون وعلي أيفون وعبد الله كان هياخذ الاثنين الثانيين والذهب كنا هنبيعه ونقسم الفلوس والفلوس اللي كانت معانا كانت فلوس بيعنا موبايل وهنقسمهم علينا واحنا بنشتري الموبايلات حد كلمنا وقالنا إن الحكومة جت البيت واخدوا كل اللي موجود في البيت.

واستكمل المتهم: ساعتها ركبت انا ومراتي واختها من طنطا وسافرنا علي اسكندرية ولما وصلت كلمت الدكتور عمر وقولتله انا اللي غلط والناس كلهم متبهدلين بسببي وعايزك تتنازل عن المحضر وهمسح كل الفويسات والاسكرينات اللي معايا ليك وقالي تمام بس بشرط أروحلة الفيلا وأديلوه كل جنية سحبتة من الفيزا وبعدها هشوف هسامحك ولا هعمل معاك اية.

وأضاف: انا ملحقتش علشان الحكومة بعدها مسكتني أنا ومراتي في اسكندرية وطلعوا بيه علي مديرية امن الإسكندرية وبعدها جابوني علي قسم اول أكتوبر.